“TÜRKMENISTAN WE AZERBAÝJAN – DOSTLUK KÖPRÜSI” ATLY SURATLAR BÄSLEŞIGI JEMLENDI

2020-nji ýylyň 13-nji noýabrynda Türkmenistanyň Azerbaýjan Respublikasyndaky Ilçihanasynyň edara binasynda  “Türkmenistan we Azerbaýjan – dostluk köprüsi” atly 7 ýaşdan 16 ýaşa çenli ýaş suratkeşleriň arasyndaky surat bäsleşiginiň ýeňijilerini sylaglamak dabarasy geçirildi.   

Bäsleşik Türkmenistanyň Azerbaýjan Respublikasyndaky Ilçihanasynyň Azerbaýjanyň Döwlet çeperçilik akademiýasy bilen bilelikde Türkmenistanyň hemişelik Bitaraplygynyň 25 ýyllygy mynasybetli hem-de iki döwletiň arasyndaky medeni-ynsanperwer gatnaşyklary giňeltmek we berkitmek maksady bilen gurnamagynda geçirildi.

Bäsleşigiň düzgünlerine laýyklykda, ýaş suratkeşleriň şekillendiriş sungatynyň islendik görnüşinde we žanrynda çekilen suratlary internet salgylar arkaly kabul edildi. Bäsleşige gatnaşmak üçin planetamyzdaky parahatçylyk we ony gorap saklamak, Türkmenistan bilen Azerbaýjanyň arasyndaky dostluk, iki doganlyk halklaryň taryhy we medeni umumylygy barada gürrüň berýän 70-den gowrak iş kabul edildi.

Bäsleşigiň netijelerine görä, dört sany ýeňiji kesgitlenildi. Olara dabaraly ýagdaýda diplomlar we ýadygärlik sowgatlary gowşuryldy. Iň gowy işler Ilçihananyň binasynda ýerleşdirildi.

https://neutrality.gov.tm/news/124/