HABARLAR
TREK-KOD UGRADYLÝAN ZATLARY YZARLAMAGA ÝARDAM EDER
«Türkmenaragatnaşyk» agentliginiň «Türkmenpoçta» poçta aragatnaşygy kompaniýasy öz täzelenen www.turkmenpost.gov.tm saýty arkaly ýurdumyzyň çäginde müşderilere eltilýän ugradylýan zatlary(posylkalary) yzarlamagy gurady. Indi posylkaňyzyň nirdedigini bilmek üçin onuň poçta identifikatoryny nyşanlyja meýdança girizip, syçanjygyň düwmesine basanyňyzdan Siz dessine onuň haçan we nireden geçenligini, häzir nirededigini bilersiňiz.
Saýtdaky posylkalaryň trekingi beýle bir kyn iş däl. Trek-kod (poçta identifikatory, yzarlama belgisi) – ýurt boýunça poçta arkaly iberilýän zatlary yzarlamaga niýetlenen özboluşly koddyr. Bütindünýä Poçta Birleşiginiň düzgüni boýunça, trek-belgi (poçta ugratmalarynyň identifikatory) latyn harplarynyň ikisinden, 9 sandan we ugradylan ýurduny görkezýän iki latyn harpyndan ybaratdyr. Posylka ugraylanda berilýän kod SMS arkaly ony alýan müşderä iberilýär.
«Türkmenpoçta» kompaniýasynyň işgärleri ilata edilýän hyzmatyň çägini giňeldýärler. Kompaniýa golaýda Polisiýanyň ýol gözegçiligi gullugynyň bellän jerimesi baradaky karary sürüjiniň öýüne eltip bermegi gurady. Raýatlara «Türkmenpoçta» kompaniýasynyň bölümlerinde olary tölemäge mümkinçilik döredildi. Kompaniýanyň täzelenen www.turkmenpost.gov.tm saýtynda şahsy kabinet açyldy, onda hasaba durup, jerimeler hakda bilip we bank karty arkaly olary töläp bolýar. Munuň üçin teklip edilýän formaty doldurmaly, onda çykarylan kararyň, ulagyň belgisi, onuň eýesiniň ady familiýasy, atasynyň ady, telefon belgisi we tölegiň möçberi görkezilýär. Tölegiň geçendigi baradaky habar telefona SMS arkaly gelýär.
Poçta gullygy bilen Polisiýanyň ýol gözegçiligi gullugynyň özara gatnaşyklarynyň indiki tapgyrynda poçta bölümlerinde diňe bir jerimeleri däl, eýsem ulagy resmileşdirmek, sürüjiler üçin synag tabşyrmak, tehniki taýdan gözegçilik bilen baglanşykly we beýleki tölegleri hem töläp bolar. Şeýle hem bu ýerde ýakyn wagtda kommunal tölegleriň we aragatnaşyk tölegleriniň ählisiniň tölegini kabul etmek göz öňünde tutulýar.
Kompaniýanyň hyzmatlarynyň arasynda demir ýol peteklerini satmak, kommunal hyzmatlar töleglerini geçirmek, Bütindünýä Poçta Birleşigine girýän islendik ýurda çaltlandyrylan poçta ugratmalarynyň tölegini amala aşyrmak ýaly hyzmatlaryň hem bardygyny ýatladýarys. Mundan başga-da, «Türkmenpoçta» kompaniýasynyň saýtynda harytlary öýe getirtmek we olar üçin nagt däl görnüşde hasaplaşmak gullugyndan peýdalanyp bolýar.