HABARLAR
GFR-NYŇ DIPLOMATY “TÜRKMENISTANYŇ BITARAPLYK SYÝASATYNDA EKOLOGIÝA DIPLOMATIÝASY” ATLY ONLAÝN OKUW SAPAGYNY GEÇIRDI
Geçen hepdede Germaniýa Federatiw Respublikasynyň Türkmenistandaky Adatdan daşary we Doly ygtyýarly Ilçisi Naýthart Hofer-Wissing “Türkmenistanyň Bitaraplyk syýasatynda ekologiýa diplomatiýasy” temasy boýunça wideoaragatnaşyk arkaly okuw sapagyny geçirdi.
Bu sapaga Türkmenistanyň Daşary işler ministrliginiň Halkara gatnaşyklary institutynyň, S.A.Nyýazow adyndaky Türkmen oba hojalyk uniwersitetiniň, Halkara nebit we gaz uniwersitetiniň professor-mugallymlary we talyplary gatnaşdylar.
Okuw sapagynyň barşynda türkmen döwletiniň parahatsöýüjilige hem-de hoşniýetli gatnaşyklara esaslanýan daşary syýasatynyň we diplomatiýasynyň halkara gatnaşyklary ulgamynda orunlarynyň berkeýänligine hem-de onuň dürli ugurlar boýunça ösdürilýänligine üns berildi.
Türkmenistanyň ählumumy ekologiýa abadançylygyny gazanmak babatynda durmuşa geçirýän daşary syýasaty durnukly ösüşiň maksatlaryna ýetmegiň möhüm guraly bolup durýar. Türkmenistan özünde sagdyn ekologiýa ýagdaýyny üpjün etmek bilen, dünýä bileleşiginiň Ýer ýüzünde ýaşamak üçin oňaýly şetleri döretmek babatda tagallalaryny birleşdirmek üçin bu ugurda halkara çärelerine işjeň gatnaşýar.
Okuw sapagynyň dowamynda oňa gatnaşanlar türkmen-german gatnaşyklary, ekologiýa çygrynda bilelikdäki hereketleriň ähmiýeti we Türkmenistanyň ekologiýa diplomatiýasynyň ähmiýeti barada pikir alyşdylar we bu ugurda degişli teklipleri hödürlediler.